Wala nakahibalo ang misis sang freelance agent sang hardware supplies kun paano ini magasugod sa ila nga pagpangabuhi matapos maulamid ang iya nga mister sa sunog sa Java Pension House sa Bacolod City sang Martes sang kaagahon.
Nahibaluan nga santo sa kumpirmasyon ni Bacolod fire marshal Fire Chief Inspector Publio Ploteña, ginkilala ang biktima nga si Arniel Bajinting sang Brgy. Bulacao, Cebu City.
Sa interview sang Bombo Radyo Bacolod sa misis sang biktima nga si Evelyn, Lunes sang kaagahon naghalin sa Cebu ang iya 42-anyos nga mister padulong sa Bacolod bangud may yara ini sang sulukton sa iya nga kliyente.
Lunes sang gab-i, nag-istoryahanay pa sila sa telepono apang natingala ang misis nga wala nakatawag ang biktima sang Martes kag wala naman nagasabat sa iya mga tawag tubtub na-off ang cellphone kahapon sang udto.
Bangud sini, tuman ang kabalaka sang misis sa natabo sa iya bana. Suno diri, wala nakapanugid ang iya bana kun sa diin ini nagcheck in.
Kahapon sang hapon, nahibaluan ni Evelyn sa abyan ni Arniel na napatay ini matapos wala makagwa sa Java Pension House sang magluntad ang sunog.
Kagab-i, kaupod ang iya mga anak, gilayon nga nagpadulong sa Bacolod ang misis agud sugaton ang bangkay sang iya mister.
Suno sa ginang, dako nga adjustment ang iya himuon agud mapadalagan ang ila pangabuhi bangud wala ini sang trabaho kag tatlo kabilog ang ila mga anak nga lunsay nagaeskwela.
