Padayon pa nga ginatumod ang identity sang bangkay sang isa ka lalaki nga nasapwan nga nagautaw-utaw sa lawod nga natung-an sang Bacolod kag Buenavista, Guimaras kaina sang aga.
Suno kay Joey Sanchez, isa sa duha ka mananagat nga nakakita sa biktima, nasiplatan lamang nila sa tunga sang lawod nga may yara sang nagautaw-utaw.
Sang ila ini ginpalapitan, ila ginkakibot nga isa ini ka bangkay sang tawo.
Ginsab-itan nila ini sang kalat kag ginguyod pakadto sa kilid sang baybay sa Purok Mabinuligon, Barangay Sum-ag, Bacolod City.
Samtang, ginatumod pa ni Theresa Gamarcha kun iya gid man himata ang nasapwan nga bangkay.
Suno kay Gamarcha, may yara siya sang duha ka mga himata nga mag-amay nga taga-Masbate nga ginreport nga namissing matapos nagpalawod sang Pebrero 18.
Sang Pebrero 20, nasapwan ang bangkay sang amay sa kadagatan sang Carles, Iloilo samtang wala pa nakita ang bangkay sang bata.
Samtang, ginapa-verify man kun ang nasapwan nga bangkay ang iya sang duha ka mga mangingisda nagikan sa Nueva Valencia, Guimaras nga namissing sadtong Pebrero 17.
