Nag-abot na sa Pilipinas kahapon ang bangkay sang tatlo ka mga overseas Filipino workers nga nagkalamatay matapos nasunog ang ila ginatiniran nga building sa Kuwait.
Ang bangkay sang mga biktima nga sanday Jesus Lopez, Edwin Petilla, kag Jeffrey Catubay ang ginbantayan kag ginsugata sang ila tagsa-tagsa ka pamilya kag mga opisyales sang gobyerno.
Suno kay Overseas Workers Welfare Administration Administrator Arnell Ignacio, may igahatag nga assistance ang OWWA kaangay sang bereavement, funeral kag iban pa nga benepisyo nga nagabalor P220,000 kag ang kumpanya nga ginatrabahuan ang magahatag man sang 10,000 dollars ukon P586,900 samtang 15,000 dollars ukon P880,350 naman ang igahatag sang Kuwaiti government kag ginaproseso pa nila ang insurance.
Duha ka iban pa nga Filipino ang nagapabilin sa Kuwait bangud sa pagsuprer sang patal nga mga injuries kag sa karun padayon pa nga ginamonitor sang embahada ang Pilipinas sa nasambit nga pungsod.
Mas ginpili naman sang anum ka mga Filipino nga nakaluwas sa sunog ang magpabilin sa Kuwait.
