Nakapauli na sa ila hometown ang bangkay sang tatlo ka mga suldado nga napatay sa engkwentro batok sa New People’s Army sa Himamaylan City sang Domingo sang aga.
Ginhatagan sang military honors sang 303rd Infantry Brigade ang tatlo ka mga fallen heroes sa send off ceremony nga ginpangunahan ni 303rd Infantry Brigade Commander Col. Inocencio Pasaporte sa Silay International Airport, Silay City, Negros Occidental kahapon.
Ang bangkay ni 2nd Lieutenant Ralf Amante Abibico kag Private First Class Carl Venice Bustamante ang ginsakay sa Philippine Air Force (PAF) C-295 cargo plane nga naglupad padulong sa General Santos International Airport para madala sa Surallah, South Cotabato ang bangkay ni Bustamante.
Ang bangkay naman ni 2nd Lieutenant Ralf Abibico ang gindala sa Clark International Airport agud makapauli sa ila hometown sa Bauko, Mt. Province.
Samtang ang bangkay naman ni Corporal Joel Nobleza ang ginsakay sa PAF UH-1H helicopter padulong Camp Gen Macario Peralta agud madala ini sa Jamindan, Capiz.
Ang tatlo ang miyembro sang 94th IB nga nagapatigayon sang community security patrols sa Brgy Carabalan, Himamaylan City bangud sa nabaton nga report nga may yara sang NPA sa lugar nga nagapang-extort sa benepisyaryo sang Social Amelioration Program (SAP) sang DSWD bangud sa COVID-19.
Suno kay Pasaporte, magapadayon ang ila community security patrols sa Himamaylan City kag sa Negros Island para sa hilway nga pagpanagtag sang SAP sa rehiyon kag para proteheran ang tagsa ka Negrense.
