Desidido nga magpasaka sang kaso ang asawa nga nakaangkon sang mga paso-paso sa lawas matapos gintutdan sang iya bana ang ila balay sa Brgy. Bulata, banwa sang Cauayan bangud nagpangayo sang kwarta halin sa ila social amelioration fund apang wala naghatag ang biktima.
Sa interview sang Bombo Radyo Bacolod kay Police Major Lowell Garinganao, hepe sang Cauayan Municipal Police Station, nakagwa na sa ospital kahapon ang 58-anyos nga biktima nga hungod nga wala ginhingadlan.
Santo sa ila imbestigasyon, nagpauli nga hubog ang suspetsado nga si Leodigario Cabalida, 60 anyos sang Lunes sang gab-i kag pag-abot sini sa ila puluy-an, nagpangayo ini sang kwarta sa iya asawa nga nakakuha sang ayuda halin sa 4Ps apang wala ini ginhatagan.
Nagbaisay pa ang duha antes naggwa si Cabalida kag gintutdan ang ila balay.
Nagtinguha nga makagwa ang asawa sa ila balay paagi sa pagtaklas sa kisame.
Nakita naman ini sang ila tupad balay nga si Jr Bernado kun sa diin nagtuyo nga buligan kuntani ang biktima apang ginlabo ini ni Cabalida.
Nagbalos man sa paglabo si Bernardo.
Nakaangkon sang pilas sa kamot ang suspetsado samtang si Bernardo naman ang napilasan sa abaga.
Handa man nga magpasaka sang kaso si Bernado batok sa suspetsado.
Nakahunong karon sa Cauayan Municipal Police Station si Cabalida.
