Patay ang 42 anyos nga lalaki matapos ginbuno sang iya mismo pakaisa bangod sa away sa irigasyon sa banwa sang Isabela.
Ang biktima nga ginkilala nga si Razel De Los Reyes, residente sang Barangay San Agustin, banwa sang Isabela samtang ang suspetsado naman ang ginkilala nga si JR Orias, 36 anyos kag residente sang Barangay Santol, banwa sang Binalbagan.
Sa interview sang Bombo Radyo kay Police Major Joseph Partidas, hepe sang Isabela Municipal Police Station, kaupod sang biktima ang suspetsado sa pag-inom sang naglisenysa si Orias nga maggwa para mangihi apang sa pagbalik sini gilayon na lamang sini nga ginbuno ang iya pakaisa nga si De Los Reyes.
Nag-agom sang igo sa dughan, sa idalom nga bahin sang ilok kag sa tiyan ang biktima nga nagresulta sa kamatayon sini.
Suno kay Partidas, ginaalegar nga ang rason sang pag-ilinaway amo nga magapaarado sang talamnan si Orias apang ginakontrolar ni De Los Reyes ang paggwa kag sulod sang tubig sa irrigation canal.
Sa karun yara na sa kustodiya sang kapulisan ang suspetsado, apang ginahulat pa ang desisyon sang pamilya kun ini ang pasakaan sang kaso.
