Nagdeklarar na sang State of Calamity ang banwa sang La Castellana bangod sa epekto sang paglupok sang Bulkan Kanlaon.
Sa interview sang Bombo Radyo Bacolod kay La Castellana Mayor Rhummyla Nicor Mangilimutan, anom ka mga nabukid nga Barangay sa banwa ang nagpatigayon sang evacuation.
Sa karun 978 ka indibidwal ukon 232 ka pamilya ang nagatinir sa evacuation centers.
Apisar nga naghuyang na ang aktibidad sang bulkan, bangod nagapabilin sa Alert Level 2 ang status sini, wala man sini ginapahanugutan ang pagbalik sang mga evacuees sa ila tagsa ka puluy-an.
Pahayag sang alkalde nga sang maglupok ang Bulkan Kanlaon sang 1969, nagtahaw man ang activities sini nga nagresulta sang pagkampante sang mga pumuluyo, apang ini ang nasundan pa sang dako nga paglupok.
Sa karun ginatinguhaan sang banwa nga mahatag ang panginahanglanon sang mga evacuees ilabi na ang mga ginhapo bangod sa ashfall kag baho sang sulfur.
May nahamtang man sila nga mga clinic sa mga evacuation centers samtang naka-alerto naman ang tanan nga health personnel sa banwa.
Isa sa karun sa problema sang banwa amo ang mainom sang tubig bangod sila ang indi pa magrisgo nga magkuha sa mga water sources sang banwa nga mahimo kontaminado sang abo kag asupre.
Sila ang nakabatun naman sang madamo nga donasyon sang tubig gikan sa Negros Occidental Provincial Government, nanarisari nga mga local officials kasubong man mga pribado nga grupo; kalakip na ang mga bugas kag iban pa nga mga foodpacks.
Napasar na sa Sangguniang Bayan ang pagdeklarar sang State of Calamity bilang preparasyon sa mahimo liwat nga paglupok sang bulkan.
Pasalig man sang alkalde nga indi man nila ubuson ang lima ka porsyento sang calamity fund nga sarang ma-alokar, agud may magamit pa sa masunod nga mga kalamidad.
