16 tanan ka mga empty fired cartridges sang cal. 45 pistol ang narecover kasunod sang pagluthang kahapon sa isa ka NBI asset sa Purok Malalusan, Barangay 32, Bacolod City.
Suno kay P/Maj. Ramel Sarona, hepe sang Bacolod Police Station 1, patal nga pilas sa lawas kag ulo ang igo sang biktima nga si Ramie Cientos, 62-anyos kag residente sang Barangay 29, Bacolod City.
Nakuha sang mga kapulisan ang apat ka slugs sang bala.
Igapaidalum naman kuntani sa autopsy ang bangkay sang biktima apang wala ginpahanugutan sang asawa sini gani magabase nalang ang mga kapulisan sa post mortem examination.
Padayun man nga gina-imbestigaran ang motibo sa pagpatay kalakip na ang posibilidad nga maykaangtanan ini sa pagka-asset sa NBI.
Apang sa karun wala pa mapamatud-an kun matuod gid man nga asset ini bangod nagafocus pa ang imbestigador sa follow-up investigation sa mga witness.
May duha naman ka CCTV camera nga yara sa atubang nga balay kun sa diin ginluthang ang biktima kag pagatinguhaan pa nga makakuha sang kopya sini.
Suno kay Sarona, nagpanaog ang mga suspetsado sa salakyan kag closed-ranged nga ginluthang si Cientos.
Santo sa mga nakakita, isa lang ka persona ang nagtiro sa biktima kaupod ang driver sang van apang nagapati si Sarona nga duha ang gunmen kag wala lang makita sang mga witness bangod gikan ini sa likod nga bahin sang driver.
