Nagpasalig ang Barangay Kagawad sang Brgy 39, Bacolod City nga hatagan nila sang certificate of indigency ang mga biktima sang sunog agud makabatun sang financial assistance.
Nahibaluan nga 82 ka balay ang totally damaged samtang siyam naman ang partially damaged, apang wala pa na-account kun pila ang kabug-usan nga households kalakip na ang renters kag sharers.
Sa interview sang Bombo Radyo Bacolod kay Barangay Kagawad Rizalina Diaz, ang mga totally damaged ang balay ang makabatun sang P15,000 nga cash assistance, P10,000 para sa partially damaged, samtang P5,000 naman ang ihatag sa mga sharers kag renters.
Apang aminado ang mga ini nga antes mahatag ang mga bulig pinansyal, ginapangitaan pa sang ID ang mga biktima.
Suno kay Diaz, nahangpan sini nga madamo sa mga biktima ang wala na napinsaran nga dal-on ang ila mga importante nga dokumento, bangod mas ginpalabi nila nga masalbar ang ila kaugalingon kag mga palangga sa kabuhi partikular na sa mga may kabataan.
Gani kalakip man sa nagkalasunog ang IDs sang mga biktima.
Pasalig sini nga sila ang magahatag sang indigency certificate nga makapamatuod nga residente ang mga ini sa Barangay agud sila ang makabatun sang bulig.
