Kadungan sang nagaduging nga kaso sang dengue sa ciudad sang Bacolod ginahingyo sang Bacolod City Health Office ang tagsa ka mga Barangay nga ibalik ang pagpatuman sang 4’oclock habit.
Ang Barangay Bata ang nagahimo naman sang tikang agud nga mauntat na ang pagduging sang kaso sang nasambit nga balatian.
Sa interview sang Bombo Radyo Bacolod kay Punong Barangay Remus Abaring, ginapangunahan sang mga ini ang pagpatigayon sang clean-up drive sa Barangay Bata, Bacolod City.
Suno diri, nagapatigayon sila sang fogging sa ila barangay kag tinutuyo sini nga likupon ang tanan nga mga Purok agud nga madula ang mga lamok nga yara sa lugar.
Apang bangud naga-inulan kahapon, wala sila nakapadayon sang fogging.
Ginpahayag man ni Abaring nga indi lamang kun alas-4:00 sang hapon sila nagapaninlo, bangud aga pa lamang sila ang nagapaninlo na.
Nagpanugyan man ini sa mga residente nga siguruhon nga ipabilin ang katinlo sa palibot kag puluy-an agud nga indi pagtiniran sang lamok ilabi na ang nagadala sang balatian nga dengue.
Nahibaluan nga nagpatigayon sang bloodletting activity ang Bacolod City Government bilang preparasyon sa padayon nga pagsaka sang kaso sang dengue.
Madumduman nga nakaligad nagdangat na sa kapin sa 800 ang narecord nga kaso sang dengue.
