Arestado ang Barangay Kagawad kag isa ka senior citizen sa ginpatigayon nga drug buybust operation sa Sitio San Roque, Purok 5, Barangay Gargato, Hinigaran, Negros Occidental alas-5:20 kahapon sang hapon.
Ang mga nadakpan amo sanday Alyas Pam, 31 anyos, kasado, Barangay Kagawad sa lugar kag si Alyas Hany, 60 anyos, kasado, wala sang trabaho, residente man sa nasambitan nga lugar.
Ang operasyon ang ginpatigayon sang Philippine Drug Enforcement Agency Regional Office Negros Island Region Negros Occidental Provincial Office (PDEA RO-NIR NOCPO), upod sa PDEA RO-NIR Regional Special Enforcement Team (RSET), PNP Drug Enforcement Group Special Operations Unit 6 kag Hinigaran Municipal Police Station.
Narecover sa duha ang duha man ka sachet sang suspected shabu nga ginabanta nagabug-at sang 10 ka gramos.
Ang mga suspects ang mangatubang sang kaso sa paglapas sa Section 5 kag 11, kag Section 26 sang Republic Act 9165 ukon Comprehensive Dangerous Drugs Act of 2002.
