Nagapabilin ang Barangay Mansilingan nga may pinakamadamo nga dengue cases sa bilog nga ciudad sang Bacolod, santo sa ulihi nga data nga ginpagwa sang Bacolod City Health Office.
As of August 20, ang syudad sang Bacolod ang may yara sang 669 dengue cases kag nagapanguna diri ang Barangay Mansilingan nga may 79 dengue cases; Taculing nga may 51; Estefania 50; Tangub nga 45; Villamonte may 41; Singcang may 40; Alijis 38; Sum-ag-35; Cabug 33 ; Handumanan 24; kag Barangay Bata may 23.
Samtang ang hot spot areas ang Barangay Mansilingan kag Barangay Taculing.
Sa interview sang Bombo Radyo Bacolod kay Punong Barangay Rodolfo Pico sang Barangay Mansilingan, ginalauman na nga madamo ang kaso sang dengue sa ila barangay bangud isa ini sa dalagko nga barangay sa syudad.
Suno kay Pico, nagapadayon man ang ila kampanya batok sa dengue.
May kabudlayan man ang mga ini sa pagpangita kag pagguba sang maitlugan sang lamok bangud nagainulan kag kun mag butang sang larvicide agud nga mapatay ang pitik-pitik, mangin kanugon lamang ini bangud anuron lamang ini sang tubig ulan.
Nagapanawagan man ini sa mga pumuluyo sang Barangay Mansilingan nga padayunon ang pagpangita kag pagguba sang ginapangitlugan sang mga lamok kag ipakonsulta gilayon ang mga kabataan kun may yara sang sintomas sang dengue agud malikawan nga maglala ang ginabatyag sang mga kabataan.
Dugang pa sang punong barangay nga ipractice ang 4S ukon search and Destroy” sang ginapangitlugan sang lamok; “Secure Self Protection” ukon magsuksok sang mga bayo nga malikawan nga makagat sang lamok, “Seek Early Consultation” kun may sintomas sang dengue; “Say Yes to Fogging” agud nga matapna ang dengue outbreak.
