Nakulangan ang grupo sang Bayan Muna sa pagresponder ni President Ferdinand “Bongbong” Marcos Jr. sa nagalala nga krisis nga ginaatubang subong sang pungsod.
Sa interview sang Bombo Radyo kay Bayan Muna Executive Vice President Atty Carlos Isagani Zarate, sa pagsugod palang sang gyera sa Middle East nakita na nga dako ang epekto sini sa enerhiya kag langis sa pungsod, apang ang administrasyon ni Marcos ang mahinay magresponder.
Suno kay Zarate, nagapakita lamang nga ang Pilipinas ang “vulnerable” bangud wala ini sang kaugalingon nga supply sang krudo.
Dugang pa, bisan pa nga nagdeklarar na sang National State of Energy Emergency, kulang sa gihapon ang tikang sang gobyerno agud masolusyonan ang nagapadayon nga krisis sang pungsod kag sang mga pumuluyo nga apektado ilabi na ang mga pigado.
Pahayag sini nga ang panawagan sang transport sectors nga isuspender ang fuel excise tax agud mapanubo na ang presyo sang produktong petrolyo, nga kuntani dugay na ginpermahan ang wala sa gihapon nahimo sang Presidente.
Paathag ni Zarate, ang kabudlayan subong nga naekperyensyahan sang mga Pilipino ang isa na ka “wake-up call” sa administrasyon ni Marcos agud mangin mas madasig kag magatutok sa pagbulig sa pumuluyo.
