Ginalantaw sang Executive Vice President sang BAYAN MUNA partylist nga ginapakita sang kampo ni former President Rodrigo Duterte nga sila ang oposisyon sa karun nga administrasyon bilang tindog para sa 2025 kag 2028 Elections.
Sa interview sang Bombo Radyo Bacolod kay Atty Carlos Isagani Zarate, ang away sang Duterte kag Marcos ang nag-umpisa sang ginpalos ang Confidential Fund ni Vice President kag Education Secretary Sara Duterte.
Ini ginsundan pa sang pagpahalin sa pwesto sang mga kaalyado ni Duterte sa House of Representatives.
Nagtuhaw man ang iban pa nga mga issue kaangay sa West Philippine Sea kun sa diin si Duterte ang makita nga dampig sa China samtang maathag naman nga pro-US si President Ferdinand “Bongbong” Marcos Jr.
Si Duterte ang nagpanguna naman sa pila ka prayer rally kag ang ulihi amo ang ginpatigayon sa atubang sang Negros Oriental Provincial Capitol kahapon.
Suno diri, tanan nga tikang ni Duterte ang kabahin sang preparayon sa politika kun sa diin ginapreparar na ang mangin kandidato sa pagka-Senador sa 2025 midterm elections kasubong man ang pagpapili ni Inday Sara sa 2018 Presidential elections.
Yara naman posibilidad nga magapapili si former President Duterte ukon si Davao City Mayor Sebastian “Baste” Duterte bilang Senador.// Suno diri, ang nakataya sa mga lihok sang duha ka kampo amo ang pagpabilin sang ila dynastiya.
Apang aminado si Zarate nga personal nga interes lamang ang ila nga ginalagas.
Pangabay sini nga dapat unahon sang mga opisyal ang pagsolbar sa mga problema sa pungsod kaangay sang kapigaduhon kag epekto sang El Niño sa mga mangunguma.
