Nagpadulong na ang mga personnel sang Bayawan City Police Station sa Ilog Municipal Police Station para sa joint investigation angot sa lalaki nga gin-alegar gin-abduct sa banwa sang Ilog, Negros Occidental kag nasapwan nga bangkay sa Bayawan City, Negros Oriental.
Ang biktima nga ginkilala nga si Alberto Balansag, residente sang Proper Talakdan, Cauayan, Negros Occidental, kag gina-alegar drug surrenderee.
Nasapwan ang bangkay sini sa katubuhan sa Sitio Kabangahan, Barangay Manduao, Bayawan City, Negros Oriental sang Lunes, Marso 24.
Sa interview sang Bombo Radyo Bacolod kay Police Major Randy Babor, hepe sang Ilog Municipal Police Station, ang Bayawan PNP amo ang magapanguna sa imbestigasyon bangod sa ila nasapwan ang bangkay, kag ang blotter report lamang sa Ilog PNP ang may kaangtanan sa gina-alegar abduction.
Sa blotter report, nagabantay ang biktima upod sa iya asawa sang Ceres Bus papauli sa Cauayan sang Marso 18 sang hinali nga gindulugan kag pwersahan nga ginpasulod sang apat ka armado nga persona sa blue nga awto ang biktima.
Suno kay Babor, wala man sang CCTV sa area bangod ini ang nabukid na nga bahin sang banwa.
