BACOLOD CITY-Ginapasalig sang bag-o ginbutang nga officer-in-charge sang Bacolod City Police Office (BCPO) nga padayunon man sini gihapon ang kampanya kontra iligal nga druga kag kriminalidad.
Ini ang pahayag ni Senior Supt. Henry Biñas nga ginbulos kay Senior Supt. Francisco Ebreo nga ginpahalin kagab-i ni Presidente Rodrigo Duterte matapos gin-akusaran nga protektor sang iligal nga druga.
Nakahibalo si Biñas nga temporaryo pa man lang ang iya pagpungko sa BCPO apang nagalaom ini nga matapos ukon may mahimo siya sa kampanya batok iligal nga druga.
Plano man nga tutukan ni Biñas ang pila pa ka problema sang ciudad kaangay na lamang sang magutok nga trapiko.
Bwas nga adlaw, magapadulong na ini diri sa ciudad sang Bacolod.
Antes ang mando sa iya nga mangin OIC sa BCPO, si Biñas ang regional chief sang Personnel and Human Resource Doctrine Development kag nangin direktor man sang Iloilo City Police Office (ICPO).
Antes gin-assign sa ICPO nangin direktor man ini sang Negros Oriental Police Provincial Office (NOCPPO).
Ang 50-anyos nga police officer ang tumandok gid sang Barotac Nuevo, Iloilo.
