May yara na sang mga personalidad nga plano imbitaron ang Bacolod City Police Office (BCPO) nga posible makahatag sang impormasyon may angot sa pagpatay sa nag-AWOL nga si Patrolman Eric Alcosaba nagligad nga Sabado sang hapon sa Brgy. Villamonte.
Sa interview sang Bombo Radyo Bacolod kay BCPO Director Police Colonel Henry Biñas, ginpahayag sini nga may nakuha na sila nga mga litrato sang mga personalidad sa salakyan ni Alcosaba kag ila plano nga imbitaron ang mga ini.
Suno sa BCPO Director, posible nga makahatag pa sang impormasyon ang nasambit nga mga personalidad tuhoy sa pagpatay sa biktima.
Apang suno kay Biñas, wala man nila ginadula ang anggulo nga may kaangtanan sa iligal nga druga ang pagpatay kay Alcosaba.
Madumduman nga isa si Alcosaba ang isa mga pulis nga gin-relieve sang 2017 matapos nga nalakip ini sa mga ginhingadlan sang self-confessed bagman sang Berya drug group kag ginpatay man nga si Ricky Serenio.
Samtang, ginpahayag ni Biñas nga ginatutukan nila karun ang Oplan Tokhang sa Brgy. 1; 2, 3 kag Banago kun sa diin ginapahayag nga madata ang transaksyon sang iligal nga druga.
