Ginpanawagan sang Bacolod City Police Office sa mga retailers nga indi magbakal kag magbaligya sang smuggled nga sigarilyo.
Ini kasunod sang asod-asod nga pagturn-over sa checkpoint operation sang dalagko nga deliveries sang smuggled nga sigarilyo sa Bacolod City.
Ini ginalakipan sang balor P21.5 million sang smuggled cigarettes nga ginturn-over sang driver sang panel van nga si Alyas Mario, 27 anyos kag helper sini nga si Alyas Mark, 20 anyos, lunsay residente sang Brgy Singcang-Airport, sa checkpoint sang Bacolod Police Station 4 sa Brgy Villamonte sang Martes, Abril 14.
Ini nasundan sang P16 million nga balor sang smuggled cigarettes nga ginturn over sa checkpoint sang Bacolod Police Station 6 sa Brgy Taculing sang Miyerkules, Abril 15.
Ini ang ginturn-over sang driver nga si Rene Talaman, 45 anyos, residente sang Cauayan kag duha ka helper nga sanday Jaymar Salazar, 44 anyos, residente sang Brgy Villamonte kag Mike Concepcion, 46 anyos, residente sang Brgy Vista Alegre.
Sa interview sang Bombo Radyo Bacolod kay BCPO Director Police Col Eugene Rebadomia, dako ang ila nga pasalamat sa pagturn-over sang mga smuggled cigarettes.
Pahanumdom sini nga wala naglabay sa husto nga evaluation ang mga sigarilyo kag indi maseguro kun ini ang may lakot nga makahalit sa lawas.
Bangod sa dako nga volume sang smuggled cigarettes nga nagsulod sa ciudad, pahanumdom ni Rebadomia sa mga retailers nga indi magbakal kag magbaligya.
