Ginpahayag ni Bacolod City Police Office Director Police Col. Eugene Rebadomia nga wala sang dapat ikabalaka kasunod sa pagkanselar sang klase sang University of Negros Occidental – Recoletos (UNO-R) matapos may nakita nga isa ka bala nga may kaupod nga sulat sang pagpamahog sa Senior High Scool building sang eskwelahan.
Sa interview sang Bombo Radyo kay Rebadomia, ginpahayag sini nga alas-10:00 kahapon sang aga nakita sang isa ka estudyante ang bala sa hagdan sang nasambit nga buluthuan kag ginreport kapulisan palas-12:10 sang udto.
Kasunod sang bala, may-ara man sang ginpadala nga written note nga nagapahayag nga maghalong bangod pamatyon sini ang mga ‘bully’ kag nagapamuyayaw.
Gilayon naman nga nagresponde ang Bacolod Police Station 6 kag nagpatigayon sang ocular inspection agud ma-secure ang area.
Suno kay Rebadomia, una nga ginhimo sang eskwelahan amo ang pagkanselar sang klase bilang precautionary measure agud masiguro ang seguridad sang mga estudyante.
Ginpakamaayo man sini ang pagreport gilayon sang estudyante nga nakakita sang bala sa chief of security.
Pahayan ni Rebadomia nga padayon ang inspection sa eskwelahan agud wala na sang makasulod nga mga butang nga mahimo makalarma sa mga estudyante.
Pasalig man sini nga handa ang kapulisan nga magresponde sa bisan ano nga emerhensya kag ginapanawagan nga magtawag sa emergency hotline 911.
Panawagan ni Rebadomia sa mga ginikanan nga istoryahon ang ila mga kabataan kag ipaathag nga indi husto ang mga ginahimo nga pagpamahog bangud ini mahimo makatuga sang emotional kag mental stress sa apektado.
Padayon naman imbestigasyon sang kapulisan sa pagtumod kun sin-o ang nagbilin sa bala kag sulat sa buluthuan.
