Gina-imbestigaran na sang Bacolod City Police Office (BCPO), Bacolod City Government, kag iban pa nga ahensya, ang bag-o nga kaso sang Online Sexual Abuse or Exploitation of Children (OSAEC) matapos marescue ang duha ka menor de edad sa isa ka operasyon sang nagligad nga semana.
Sa interview sang Bombo Radyo Bacolod kay Police Captain Ma. Liberty Indiape, officer-in-charge sang BCPO Women and Children Protection Desk, mahimo may mga kliyente nga nagabayad agud maglantaw sang content nga ginapahimo sa mga kabataan paagi sa pakig-transaksyon sa nagadumala sa mga menor de edad.
Suno diri, lunsay naga-eskwela pa ang duha nga na-rescue.
Sa karon, yara na sa pag-atipan sang mga social worker ang mga menor de edad.
Ginahibalo man kun nakalab-ot sa iban nga pungsod ang mga content.
Suno kay Indiape, nagapakig-angot na sila sa nagkalain-lain nga ahensya, samtang wala pa sang may nadakpan nga mga offender.
