Subong nga adlaw, ginalauman ang mas hugot nga pagbantay sang mga kapulisan sa nagkalain-lain nga patyo sa ciudad sang Bacolod kadungan sang pag-obserbar sang tigkalalag.
Sa interview sang Bombo Radyo kay Police Lt. Col. Lester Leada, chief sang operations management unit sang Bacolod City Police Office (BCPO), sang tinalikdan nga Biyernes, nagsugod na ang deployment sang mga police personnel sa nagkalain-lain nga mga patyo sa ciudad kag sila ang magapabilin tubtob Nobyembre 4.
Suno diri, apisar nga may mga kaugalingon nga security guards kag bantay ang mga pribado nga sementeryo, may mga personnel sa gihapon sagwa sang patyo kaupod ang mga katapo sang Bacolod Traffic Authority Office agud maregulate ang traffic kag malikawan ang mga vehicular accident.
Suno kay Leada, santo sa assessment sang mga station commanders, generally peaceful ang mga patyo kahapon kag subong nga adlaw, ginalauman nga magadamo na gid ang magabisita ilabi na sa dalagko nga mga patyo.
Sang tinalikdan nga semana, nakighinun-anon na sila kay Mayor Alfredo Benitez agud maistoryahon kun paano masecure ang mga sementeryo sa tigkalalag.
May traffic rerouting man ilabi na sa bahin sa Burgos.
Subong nga adlaw ginalauman nga mas strikto ang pagbantay sang mga kapulisan agud mapatuman ang layi kag masiguro nga mangin malinong kag matawhay ang pagsaulog sang tigkalalag.
