Ginpatigayon ang first trial sa isa ka panibag-o nga Beach Waste Collector sa Coastal Clean-up Drive nga ginpatigayon sa Villarosa Beach sa Barangay Punta Taytay, Bacolod City.
Sa interview sang Bombo Radyo Bacolod kay Councilor Jason Villarosa, chairman sa Committee on Tourism sa Sangguniang Panlungsod, ang ABOMAR Corporation ang nagdangop sa iya bilang decendants sang tag-iya sang nasambitan nga resort agud itest run ang ila panibag-o nga machine.
Sa ginpatigayon nga aktibidad sila ang gin-updan man sang mga government agencie, non-government organization kasubong man sang mga estudyante gikan sa University of Negros Occidental – Recolletos kag Sum-ag National High School.
Ang Beach Waste Collector ang sarang nga makasikop sang duha ka inches nga balas kun sa diin ang mga basura ang nagasulod sa collector sini samtang ginabalik lamang ang balas.
Ini ang may mekanismo man nga nagahipid sa malabayan nga balas.
Ang coastal clean-up drive ang ginsaksihan man mismo sang product manager sang kompanya kasubong man nanday Councilors’ Claudio Jesus “Kalaw” Puentevella kag Pao Sy.
Ginpakita man sini ang “before and after” sa performance sang machine kay Bacolod City Mayor Alfredo “Albee” Benitez.
Nagapati ang konsehal nga dako nga bulig kun may kaangay nga machine ang ciudad agud mahapos ang pagtinlo sa mga coastal areas kag mga beach resort sa nagkalainlain nga bahin sang ciudad sang Bacolod.
Pahanumdom sini nga napasar na ang ordinansa nga nagakilala sa Barangay Punta Taytay bilang Coastal Tourism Zone sang Bacolod City.
Pinaagi sini, ginahatagan sang responsibilidad ang mga beach owners sa pagmentinar sa katinlo sang mga coastal areas kag sa tion nga may madakpan nga nagahaboy sang basura, ang mga ini ang may pangatubangon man nga penalidad.
Apang aminado si Villarosa, nga may-ara lamang sang kakulangan sa bahin sang implementasyon sa ordinansa.
