Emotional nga ginbaton ni Mrs. Elvisita Quiyo ang yabi sa bag-o sini nga puluy-an bilang benepisyaryo sang Lingkod Bayanihan Barangayanihan Pabahay sang La Carlota City Police Station.
Sa interview sang Bombo Radyo kay Police Lt. Col. Jonel Guadalupe, hepe sang La Carlota City Police Station, ginpatigayon ang turn-over ceremony kahapon sa bag-o nga balay ni Quiyo ukon Nanay Eldy sang Purok 1, Barangay Nagasi, La Carlota City.
Ini ang ginpangunahan ni Negros Occidental Police Provincial Office Director Police Col. Romy Palgue kaupod kay Police Col. Leonardo Borromeo, DPDO, ni Guadalupe, Mr. Homer Bermudo, general manager sang La Carlota City Water District, Jacob Liansing, executive assistance to the Mayor kag Hon. Marive Montoya, ang punong barangay sang Barangay Nagasi.
Suno kay Guadalupe, si Quiyo ang wala na sang immediate family kag nagapuyo kaupod ang iya mga apo sa ila balay nga himo sa light materials bangud ang bana sini ang nagtaliwan sang tinalikdan nga Abril.
Suno diri, masami sila nga nagakabasa kun mag-ulan.
Gani ila ginhimo ang ini nga inisyatibo nga suno sa hepe, natigayon bangud sa bulig sang LGU, mga opisyal sang Barangay Nagasi, mga stake holders kag advocacy support.
Suno sa iya, emotional kag tuman ang pagpasalamat ni Nanay Eldy kag ginpahayag nga bangud sa ila nga bulig, indi na sila magtulog nga basa kun nagaulan.
