BACOLOD CITY-Ginkanselar ni Negros Occidental Governor Eugenio Jose “Bong” Lacson ang nakatalana kuntani nga bidding kahapon sang probinsya sa mga utility personnel services agency.
Ini ang ginkumpirmar ni Provincial Administrator Atty. Rayfrando Diaz.
Suno kay Diaz, ginkanselar ni Lacson ang bidding bangud plano sini nga himuon nga mga job order ang mga utility personnel nga kadamuan nakadestino sa mga ospital sa probinsya.
Bangud sa nasambit nga katuyuan sang gobernador, indi na sini luyag nga mag-agi sa mga agency ang mga utility personnel bangud sa cost-cutting kag pagpakaayo man sang budget sang probinsya.
Nahibaluan nga P90 million kada tuig ang gina-gasto sang probinsya para sa sweldo sang mga utility workers.
Sa karon, may yara sang 395 utility workers ang Negros Occidental.
Madumduman man nga sang Disyembre nagligad nga tuig pa kuntani na-expire ang kontrata sang probinsya kag sang mga utility personnel services agency apang gin-extend ini tubtob sa bulan sang Marso sini nga tuig.
