Sa tunga sang mga panawagan sang pila ka mga miyembro sang Democratic party nga magpaiway na lamang si US President Joe Biden sa iya re-election bid sang Estados Unidos sa Nobyembre 5, indi hungod nga natawag sang 81-anyos nga Presidente si Ukrainian President Voldymyr Zelynskiy bilang “President Putin”.
Sa NATO summit sa Washington, ginkakibot sang kadam-an ang sala ni Biden kun sa diin iya ginpahayag nga luyag na sini nga ihatag ang mikropono sa Presidente sang ukraine, nga may kaisog nga determinasyon, si President Putin.
Gincorrect man sini gilayon ang iya kaugalingon kag ginpahayag nga ang iya ginatumod amu ang magalutos kay President Putin, si President Zelensky.
Suno diri, natuman kafocus ang iya panghuna-huna sa paglutos kay Putin.
Ang nasambit nga sala ni Biden ang natabo antes ang isa ka news conference kun sa diin tinutuyo sini nga mapagahagan-hagan ang kahangawa sang iya mga kaupdanan nga Democrats nga wala na ini sang abilidad nga lutuson si former President Donald Trump sang Nobyembre ukon pamunuan ang pungsod sa masunod nga apat ka tuig.
Sa karun, 13 sa 213 ka mga Democrats sa Kongreso kag isa sa 51 ka mga Democrats sa Senado ang nag-apelar publicly sa Presidente nga magwithdraw na sang iya kandidatura.
