Nagsaka na sa 125 ang kaso sang mga nasamaran tuga sang palupok duha ka adlaw antes sang pagsaulog sang Bag-ong Tuig.
Ini ang ginkumpirmar sang Department of Health (DOH) kahapon, Disyembre 29.
Suno kay DOH spokesperson Assistant Secretary Albert Domingo, ang 125 nga mga kaso sang mga nasamaran ang narecord humalin sang Disyembre 21 tubtob 29, ang mas nubo sang 27 porsyento kun ipaanggid sa 171 ka mga kaso nga narecord sa kaangay nga period nakaligad nga tuig.
Ang pinakamadamo nga kaso ang gikan sa National Capital Region nga may 57, ginsundan sang Ilocos Region nga may 12 kag Central Luzon nga may 11.
Kalabanan sa mga biktima ang mga lalaki nga naga-edad lima tubtob 14 anyos.
Nahibaluan nga ang narekord nga mga firecracker-related incidents ang tuga sang 5-star, mga palupok nga indi kilala, boga, pwitis, mga palupok nga wala sang label ukon imported kag whistle bomb.
Suno kay Dominggo, base sa listahan sang mga mga palupok ang pwitis kag whistle bomb ang pareho nga legal kag mabakal sa licensed dealers.
Gani, ginpaathaag sini nga mapa legal ukon illegal man, indi gid dapat ginpauyat sang mga palupok ang mga kabataan.
Dugang pa nga makita sa datos nga narekord nga dapat mangin hugot ang pagbantay sa mga kabataan ilabi na sa mga lalaki.
