Nag-withdraw ang bilog nga delegasyon sang Cambodia sa Southeast Asian Games kahapon matapos magsanyog ang pag-ilinaway sa border sa tunga sang Cambodia kag Thailand.
Madumduman nga ang 2025 SEA Games ang ginapatigayon sa Thailand.
Ang inaway sa duha ka pungsod ang nagresulta na sa pagkamatay sang 11 ka mga suldado kag pila ka mga sibilyan sa lugar.
Suno sang hepe sang National Olympic Committee of Cambodia (NOCC), ginpapauli ang tanan nga mga atleta sang pungsod bangud sa kabalaka kag hingyo sang pamilya para sa saftey sang ila nga mga kabataan kag sang tanan.
Nahibaluan nga opisyal nga nagsugod ang SEA games sang Martes kag magapadayon tubtob Disyembre 20 sa Bangkok kun sa diin may yara sang libo-libo nga atleta nga nagpartisipar halin sa Southeast Asian countries.
Samtang ginpabaskog man ang seguridad sa opening ceremony sang Martes sa Rajamangala National Stadium sa Bangkok kun sa diin nagtambong ang mga Thai royals.
Masobra 500,000 ka mga pumuluyo ang gin-evacuate sang otoridad matapos ang inaway sa duha ka pungsod.
Nahibaluan nga ang dispute sadto paman nga panahon kun sa diin ang duha ka pungsod ang wala naga-ugyon sa border nga gin-set sang French colonial ruling, kalakip ang pag-angkon sang mga boundary sang mga templo.
