Ginakalipay sang Binalbagan Municipal Police Station ang ila pagpanguna sa may pinakamadamo nga ginpatigayon nga operasyon sa accomplishment report sang Negros Occidental Police Provincial Office (NOCCPO) sang tuig 2020 bangud sa 259 ka mga operasyon.
Sa interview sang Bombo Radyo kay Police Major Fernando Somblingo, hepe sang Binalbagan Municipal Police Station, ginapahayag sini nga may yara sila sang ginapatigayon nga Birada Semana nga ila weekly report kag nagatutok gid sa kampanya batok sa illegal nga druga, illegal possession of firearms, gambling, fishing, wanted persons kag pagbantay sa mga checkpoints.
Suno kay Somblingo, ini bangud man sa suporta sang local government unit nga wala gid nagapabaya ulabu na kun may yara sila sang mga operasyon.
Gin-athag man sini nga indi bangud madamo sila sang ginpatigayon nga operasyon, madamo sang gamo nga nagluntad sa banwa sang Binalbagan kundi nagapakita lamang ini nga ang mga pulis sa ila banwa ang wala gid nagapabaya sa trabaho.
Ginadedikar ni Somblingo ang kadalag-an nga ila nabaton sa iya mga personnel, sa banwa sang Binalbagan kag mga pumuluyo.
Nagpasalig man ini nga magapadayon sila sa pagserbisyo agud masiguro ang kaluwasan kag seguridad sang mga residente.
Nagpangaduha naman sa may pinakamadamo nga napatigayon nga operasyon sa Negros Occidental sang 2020 ang Talisay City Police Station bangud sa 257 ka mga operasyon.
Sa interview sang Bombo Radyo kay Police Major Jigger Gimeno, hepe sang Talisay City Police Station, ginpahayag sini nga wala sila nagalaom sa kun ano man nga pasidungog kag luyag lang nga magtrabaho sang tubtob ila masarangan.
Apang ginakalipay man sini ang naangkon nga kadalag-an kag ginabalik ini sa ciudad sang Talisay, iya mga personnel kag mga pumuluyo nga nagahatag sang impormasyon.
Nagapasalamat ini sa pagsalig kag pagtuo sang mga pumuluyo kag ginpahayag nga kun wala ini, indi sila mangin madinalag-on.
Ginapabugal man sang hepe ang iya mga tinawo ilabi na ang mga ara sa field nga nagapulaw-bugtaw agud malab-ot ang requirements sang regional office.
Suno sa iya, ang pinakamadamo nga operasyon nga ila natigayon ang ginalakipan sang illegal drugs, wanted persons kag illegal gambling.
Aminado man ini nga madamo pa sila sang mga target nga wala pa madakpan gani suno diri, ang ila wala matrabaho sang nagligad nga tuig ang ila tinguhaan sa karun nga matigayon.
