Ginkwestiyon sang bise presidente sang Board of Directors sang Central Negros Electric Cooperatives (CENECO) Inc. ang pagkaltas sa bonus sang mga empleyado sang tig-P5,000 agud i-contribute sa ila partylist nga APEC.
Sa interview sang Bombo Radyo Bacolod kay Roy Marfil Cordova, nagpadala siya sang sulat sa management sang CENECO agud hibaluon kun sin-o ang nagbaton sang gin-donar nga P5,000 gikan sa 400 ka mga empleyado nga may kabug-usan nga P2 milyon pesos.
Apang ginsabat siya sang management nga indi nila pwede ipahibalo bangud sa data privacy law.
Suno kay Cordova, dapat mangin transparent ang CENECO ilabi na sa kwarta sang mga konsumedor kag ipahibaluon kun ano ang nagakatabo sa sulod.
Gin-athag man sini nga wala sa resolusyon nila nga ihatag ang bonus sang mga empleyado sa mga partisan political activity ukon sa pag-pangampanya.
Luyag sa karun pa-imbestigaran ni Cordova ang natabo nga pagkaltas sang P5,000 sa bonus sang mga empleyado nga P20,000 nga wala naman sang may gin-presentar nga resibo.
