Ginpanindugan sang Media Relations Officer sang Vallacar Transit Incorporated nga padayon ang pagbiyahe sang mga Ceres buses halin sa Negros Occidental padulong sa Negros Oriental apang magasunod sila sa ginapatuman nga mga pagsulundan agud malikawan nga mainfect sang coronavirus 2019 (COVID-19) disease ang mga pasahero.
Ini ang kasunod sang pahayag ni Governor Bong Lacson nga makig-angot ang mga opisyales sa Vallacar Transit Incorporated nga madihon sang stratehiya nga tubtub lamang sa border sang La Castellana kag Canlaon ang Ceres buses.
Sa interview sang Bombo Radyo kay Jade Seballos, ginpahayag sini nga katungdanan nila nga magserbe sa riding public apang nagahingyo ini sang pag-intiende sang publiko.
Suno kay Seballos, iga-sanction sila sang Land Transportation Franchising and Regulatory Board kun indi nila makumpleto ang ruta santo sa ila prangkisa.
Apang kun imandu sang provincial government suno kay Seballos nga may mga lugar nga indi na nila masulod, sila ang magasunod.
Samtang ginpasiguro man sini nga may yara sang mga precautionary measures nga ginahimo ang bus company.
Isa na diri suno sa iya ang pagbutang sang washing area sa mga terminals kag ginapasiguro man sini nga nagasuksok sang mask ang driver kag konduktor sang bus.
Samtang, napulo lang ka mga pasahero ang ginatugutan nga magsakay sa aircon nga bus agud masiguro nga may yara sang isa ka metro nga distansya ang kada pasahero.
