Ginkumpirmar sang pinuno sang Coast Guard Station-Negros Occidental nga nag-resume na ang biyahe sang mga fastcraft kag roro vessels nga nagalayag Iloilo-Bacolod vice versa sugod alas-9:00 kaina sang aga kasunod sang pagbatak sang storm signal sa Iloilo City kag Bacolod City.
Sa interview sang Bombo Radyo Bacolod kay Capt. Ludovico Librilla, commander sang Coast Guard Station-Negros Occidental, ginpahayag sini nga balik na ang biyahe sang mga sakayang-pandagat bangud wala na sang storm signal sa duha ka mga probinsya.
Suno kay Librilla, kalabanan sa mga nastranded sa Bredco port amo ang mga pahinante kag drivers sang rolling cargos padulong sa Iloilo.
Magluwas diri, nagbalik naman ang byahe sang mga roro vessels sa Escalante Port, San Carlos Port kag Sagay Port padulong sa Cebu.
Samtang, ginkumpirmar naman ni Bernadeth Montelibano, officer-in-charge sang Bacolod City Disaster Risk Reduction and Management Office nga wala sang may narekord nga pagsaka sang tubig sa ciudad.
Suno kay Montelibano, manipis lamang nga pag-ulan ang na-eksperyensyahan sa Bacolod City kag manubo lang ang hightide gani nga wala nagsaka ang tubig sa mga suba.
Apang, magapabilin naman sa blue alert status ang CDRRMO samtang wala pa nakagwa sa Philippine Area of Responsibility si Auring.
Nahibaluan nga nangin low pressure area (LPA) na lamang ini kag nadula na ang storm signal sa pungsod santo sa pinakaulihi nga weather bulletin sang PAGASA, alas-2:00 kaina sang hapon.
