May mga adjustment na nga ginapatuman sa Bureau of Jail Management and Penology (BJMP) – Handumanan agud indi matam-an sa tuman nga init ang mga persons deprived of liberty (PDL).
Sa interview sang Bombo Radyo Bacolod kay Jail Superintendent Abner Zamora, nasolusyunan na nila ang pinakadako nga problema sa BJMP-Handumanan sang Oktobre 2022.
Ini ang kakulang sang supply sang tubig.
Suno kay Zamora, nagpakutkot sila sang duha ka deep well bilang water source, gani sila ang may nagakaigo na nga supply sang tubig, kag may sobra pa para sa pagpamunyag.
Karun nga mataas ang heat index bangod sa El Niño phenomenon, ang BJMP-Handumanan ang nagpatuman man sang adjustment.
Suno diri ang mga PDL ang may siesta time nga alas-12:00 sang udto tubtob ala-1:00 sang hapon.
Apang nakita nila nga indi man gihapon makapahuway ang mga priso bangod tuman ka init sa ila nga silda.
Gani, ginpahanugutan na lamang sini nga sa nasambitan nga oras, mapagwa lamang sa selda ang mga priso agud sila ang makapangita sang mahangin kag mahandong nga lugar./
Pasalig ni Zamora sa pamilya sang mga PDL nga ang mga ini ang ginahatagan sang nagapanguna nila nga panginahanglanon agud mabatyagan man sang mga ini nga sila ang may kinamatarong gihapon bilang tawo.
Sa pihak nga bahin, wala naman sang adjustment nga ginpatigayon sa Metro Bacolod District Jail Male Dormitory sa Barangay Taculing, Bacolod City.
Nahibaluan nga may-ara sang 169 nga mga PDL sa nasambitan nga pasilidad.
Apang pasalig sang mga ini nga 24 oras, may nurse nga nagatsekyar sa body mass index sang mga priso.
Sila ang may nagakaigo man nga supply sang mainom nga tubig.
