Ginahingagaw nga mapatigayon ang inquest proceeding agud mapasaka ang kaso sa body guard nga ginalantaw suspect sa pagtiro-patay sa negosyante sa Barangay Villamonte, Bacolod City.
Ang biktima ang ginkilala nga si Jun Alaba, residente sang Barangay Estefania, Bacolod City samtang ang suspect amo si Ronel Rafael, 34 anyos, residente sang banwa sang Toboso.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 4, nagdesisyon ini nga ihold si Rafael matapos makita nga wala sang igo sang bala ang salakyan gani dako ang tyansa nga gikan sa sulod ang suspect.
Si Rafael ang ginpaidalum naman sa paraffin test samtang ginpaidalom naman sa ballistic examination ang narecover nga armas-luthang nga ginhaboy sa hilamonan.
Apang suno kay Depasucat, ang resulta sang mga test ang duha ka adlaw pa antes maggwa.
Paathag sini nga halos tanan nga mga circumstantial evidence ang nagatudlo sa body guard.
Magluwas sa wala sang igo sang bala sa salakyan, narecover man ang empty shell kag bala sa salakyan.
Ang biktima amo ang nagadrive sang salakyan samtang sa passenger seat naman ang security guard kag ang igo sang biktima ang yara sa iya nga kilid.
Sa imbestigasyon natumod nga nagapa-utang ang negosyante samtang ang iya body guard ang nagapatigayon sang kliyente kag nagabatun sang porsyento.
Ginalantaw ang posibilidad nga may nagluntad nga pagba-isay sa duha samtang yara sa sulod sang salakyan, nagpukutay sang armas, tubtob nga natiruhan si Alaba.
Isa sa mahimo rasun amo ang kulang nga remittances sang kwarta ukon wala nasukot nga utang.
