Nadugangan naman ang inspirasyon sang Bombo Radyo Bacolod sa paghatag sang maayo nga serbisyo publiko matapos nga nakabaton sang award gikan sa BILIB sang Communication Department sang University of Saint La Salle-Bacolod.
Ginkilala bilang best AM radio station ukon AM RADIO STATION OF THE YEAR ang DYWB Bombo Radyo Bacolod.
Sa interview sang Bombo Radyo Bacolod Esther Joyce Limbana, Event Director, 23rd Bilib Awards, ang Bilib awards ang ginapatigayon kada tuig sang Communication Department ng University of St. La Salle-Bacolod agud nga kilalahon ang indi matupungan nga outputs sang mga estudyante, faculties kag mangin ang media outlets.
Ang 23rd BILIB AWARDS ang may tema nga Existence: Exalted on High.
Suno kay Limbana, nakuha sang Bombo Radyo Bacolod ang AM RADIO OF THE YEAR matapos ang ginpatigayon nga survey kag napilian ang Bombo Radyo.
Ang nasambit nga award ang nagkilala sang dedikasyon kag serbisyo nga ginpatigayon sang DYWB Bombo Radyo Bacolod bilang media outlet.
Suno pa diri ang Bombo Radyo Bacolod man ang Grand Slam winner sa nasabmbit nga award bangud sa sulod na sang pila ka tuig ang Bombo Radyo nakakuha sang award.
Ang award ang ginbaton ni Bombo Daniel Lecciones, ang Acting Station Manager sang Bombo Radyo Bacolod.
Ginpasalamatan naman ni Bombo Daniel Lecciones ang BILIB Awards sang University of Saint La Salle-Bacolod, Communication Department sa ila pagkilala sang effort sang Bombo Radyo Bacolod sa paghatag sang serbisyo publiko.
Agud nga mahibaluan ang nagdaog sang award ang mga estudyante sang Mass Communication sang nasambit nga unibersidad ang nagapatigayon sang survey.
Suno kay Bombo Daniel Lecciones, ang award ang magaserbe nga inspirasyon sang Bombo Radyo Bacolod sa paghatag sang mas maayo pa gid nga serbisyo publiko.