BACOLOD CITY — Bisan paano nabuhinan ang ginabatyag nga pin-ot sang dughan sang isa ka single parent nga nagasufrer sang breast cancer sa banwa sang Valladolid matapos nga personal nga gindul-ong sang Bombo Radyo Bacolod ang bulig nga ginhatag sang isa ka “Good Samaritan”.
Kaina sang hapon nagpadulong ang team sang Bombo Radyo Bacolod sa pagpanguna sang station manager nga si Bombo Mary Divine Grace Cuello agud personal nga ihatag ang cash kag grocery items kay Gina Soberano sang Poblacion, Valladolid.
Si Soberano ang stage 4 breast cancer patient kag iloy sang tatlo ka mga kabataan nga sanday Isaac nga isa ka Grade 6 student, Daniel; Grade 3 kag si Matthew nga isa ka Nursery student.
Si Soberano ang nakilala sang estasyon matapos gin-feature ang istorya sang kabuhi sini sa Mother’s Day Special sang Good Morning Philippines (GMP) Program.
Sa pag-abot sang Bombo Radyo sa puluy-an ni Soberano, gintuad sini nga tatlo na ka adlaw nga wala siya naka-inom sang bulong bangud magluwas nga wala sang stocks sini, wala man sila sang inugbakal.
Suno diri, bisan nga may ginabatyag siya mas gina-una sini ang kinahanglanon sang iya mga kabataan.
Nahibaluan nga ginabuligan ini sang iya tiyo kag magulang nga maestra sa adlaw-adlaw nila nga kinahanglanon.
Sa karun plano sini nga ibakal sang mga kulang pa nga gamit sang iya mga bata ang cash nga ginhatag sang wala na nagpakilala pa nga donor kag magsugod sang diutay nga negosyo.
Tuman man ang pagpasalamat sini sa nasambit nga “Good Samaritan” kag sa Bombo Radyo nga personal gid nga nagkadto sa iya puluy-an agud idul-ong ang bulig.
Bangud sini, ginpahayag ni Soberano nga bisan paano nabuhinan ang pin-ot sa dughan nga iya nabatyagan bangud nga may inugbakal na ini sang bulong kag makasugod sang gamay nga negosyo.
