Ginaduso sang Sangguniang Panlungsod sang ciudad sang Bacolod nga mapasakaan ang budget para sa miyembro sang Pantawid Pamilyang Pilipino Program (4Ps).
Sa interview sang Bombo Radyo Bacolod kay Councilor Atty Caesar Distrito, naghingyo ini sa Department of Social Welfare and Development- Negros Island Region kag kay DSWD secretary Rex Gatchalian nga mapasakaan ang budget sang 4Ps beneficiaries sa ciudad para sa tuig 2026.
Suno diri, ang populasyon sa ciudad yara sa kapin 700,000 ka mga indibidwal kag kapin 11,700 ka panimalay ang miyembro sang 4Ps.
Suno kay Distrito, ang Bacolod City ang may pinakadako nga populasyon apang sa iban nga ciudad dalagko ang ila nga budget para sa low income families.
Pahayag sini, ang pagdugang sang budget makapasanyog sa ekonomiya sang ciudad bangod mas madamo na sang makasarang magbakal sang mga balaklon.
Apang, paandam sini nga dapat ang bata sang 4Ps members naga-eskwela, kumpleto ang bakuna kag kun tani gamiton sang insakto ang bulig nga ginahatag.
