Ginaduso subong sa Senado ang isa ka hagna nga magatugot sa mga produktong petrolyo kaangay sang diesel kag gasolina nga ipaidalom sa price control sa tion sang krisis.
Ini ang ginfile ni Senator Bam Aquino nga nagatuyo nga masabat ang kakulangan sa Republic Act No. 7581 ukon Price Act, kun sa diin indi sakop sang price control ang mga fuel products apisar dako ang epekto sini sa presyo sang iban nga mga balaklon.
Sa idalom sang proposal, ang mga pagkontrol sa presyo sang langis ang mahimo nga ipatuman sa sulod sang 30 ka adlaw kon may yara sang krisis, mas malawig sangsa 15 ka adlaw nga ginalakipan lamang ang LPG kag kerosene.
Suno sa senador, apisar deregulated ang fuel industry, indi dapat pagpabay-an nga magsaka ang presyo ilabi na kun direkta nga maapektohan ang palangabuhian sang publiko.
