Gin-report sang Bureau of Immigration (BI) nga ang Chinese national nga nadakpan sang tinalikdan nga semana bangud sa gina-alegar nga pagpang-espiya ang produkto sang Chinese military institution ukon People’s Liberation Army.
Ginkilala ang naaresto nga Chinese nga si Deng Yuanqing.
Siya ang naaresto sadtong Enero 17.
Suno kay BI Commissioner Joel Anthony Viado, isa si Deng ka information technology specialist kag ang trabaho sini amo ang pagpangtipun sang mga impormasyon kaangot sa so-called infrastructures nga importante diri sa Pilipinas.
Dugang pa ni Viado, ginimbestigaran pa kun ano gid ang matuod nga motibo sang foreigner nga nagpanugid man nga nagatinir na ini sa Pilipinas halin pa sadtong 2013 kag nagagwa-sulod pa sa pungsod.
Kasado man ini sa isa ka Pinay kag may yara sang isa ka anak.
Madumduman nga sang nadakpan si Deng sang mga operatiba sang National Bureau of Investigation (NBI), kaupod sini ang mga Pinoy nga sanday Ronel Jojo Balundo Besa kag Jason Amado Fernandez.
Ginpatigayon ang pag-aresto sa condominium sa Makati City bangud sa alleged espionage activities sa key military and civilian infrastructure sa Pilipinas.
