Gina-monitor karon sang Bureau of Quarantine ang duha ka mga overseas Filipino workers (OFWs) nga nag-abot sa pungsod kagab-i nagikan sa Wuhan City, China.// Suno kay BOQ Director Dr. Ferdinand Salcedo, ila karon ginamonitor ang duha ka mga OFW sang makaisa ukon maduha ka beses kada adlaw.
Dugang pa sini, wala man sang may ginapakita nga sintomas sang novel coronavirus ang duha.
Suno sa Department of Health, nagatinir karon ang duha sa condominium unit kag naga-self quarantine.
Sa pinakaulihi nga data sang DOH, nagdangat na sa 23 ka mga persona ang ginpaidalom sa imbestigasyon bangud sa posible nga nCoV infection.
Ang ini nga mga pasyente ang naka-admit karon sa nagkalain-lain nga mga ospital sa pungsod.
Samtang, nagtaliwan naman ang isa ka Chinese national sa San Lazaro Hospital kaina sang aga.
Suno sa otoridad, napatay ini bangud sa pneumonia.
Ginkuhaan naman sang specimen ang 29-anyos nga Chinese national nagikan sa Yunnan province sa China agud ipaidalom sa testing kun positibo ini sa nCoV infection.
