Wala na sang extension ang Business One Stop Shop sa ciudad sang Bacolod matapos nga ini ang nagtakop sang Pebrero 15 samtang magapadayon naman ang pagkuha sang business permits apang may surcharge na.
Sa interview sang Bombo Radyo Bacolod kay Bacolod City Councilor Al Victor Espino, Chairperson sang Committee on Laws and Ordinances, wala na ginpahanugutan ang extension sa pihak sang sulat sang Metro Bacolod Chamber of Commerce and Industry (MBCCI) nga nagaayo sang extension.
Suno kay Espino, nakigsapol ini sa Bacolod City Treasurers Office agud lantawon ang numero sang nakolekta sang ciudad.
Suno diri indi man apektado ang koleksyon bisan wala sang extension kag sa pagkamatuod mas dako pa ang ginsaka sang nakolekta subong nga tuig kun ipaanggid sa nakaligad nga tuig.
Ginpahayag man sini nga ang collection subong nga tuig ang indi magnubo sa P50 million.
Suno diri, wala nagendorso sang approval para sa extension sang Business One Stop Shop bangud wala ini ginasuportahan sang numero sang collection.
Dugang pa sang konsehal, makita man sa numero nga madamo sang mga negosyante ang nagtinguha nga magkuha sang business permit kasubong man magrenew on time.
Suno diri tatlo na katuig nga wala nagahatag sang extension ang ciudad kag ginpahayag man sang konsehal nga indi man patas sa nagtinguha nga magkuha kag magrenew sang business permits on time kun magahatag sang extension.
Suno diri, ang mga wala pa makakuha kag makarenew sang nasambit nga permits ang mahimo sagihapon magkuha apang may yara lang nga pagabayaran nga surcharge nga 10 percent.
