Napuno sang abo ang mga pananom kag mga pamalay sa pila ka bahin sang La Carlota City, Negros Occidental kasunod sang moderately explosive eruption sang Bulkan Kanlaon kahapon.
Sa interview sang Bombo Radyo Bacolod kay Nida Salsalina, Purok Chairwoman sang Sitio Guintubdan, Brgy Ara-al, La Carlota City, yara sila sa plaza kag nagapreparar para sa opening salvo sang ila nga kapiyestahan sa Sabado sang mabatian ang pagsigabong sang Bulkan.
Gilayon man nga ginpapauli ang mga residente, samtang siya nga isa ka Emergecy Medical Responder ang gilayon naman nga nagpadulong sa clinic kag nagcontact sa rescue team sang La Carlota City government.
Suno diri, preemtive ukon voluntary evacuation lamang ang ginpatigayon, gani nangin prayoridad nila sa evacuation ang mga vulnerable sector kaangay sa mga may respiratory illnesses, kabataan, senior citizen, nagabusong kag mga persons with disabilities (PWDs).
May tion naman nga makapreparar ang mga residente bangod matapos sang pagsigabong, napulo tubtob kinse minutos pa antes nagtupa ang abo.
Madamo man sang nagpabilin sa ila nga mga puluy-an agud magflushing sang mga abo, kag may makapakaon sa mga hinuptan nga kasapatan.
Ang mga evacuees ang temporaryo nga ginpatinir sa La Carlota South Elementary School 1, nga nagaserbe nga evacuation center.
Suno kay Salsalina, may napatigayon na nga simulation exercise sa Barangay para sa paglupok sang Bulkan, gani nakahibalo na ang mga residente sang ila nga himuon.
Ang kada pamilya ang may nakapreparar naman nga mga “go bags” hinali nga kinahanglan mag-evacuate.
