May yara sang tatlo ka mga persons under investigation (PUIs) kag masobra 140 ka mga persons under monitoring (PUMs) angot sa coronavirus disease 2019 (COVID-19) sa ciudad sang Cadiz.
Sa interview sang Bombo Radyo Bacolod kay Cadiz City Mayor Salvador Escalante, ginkumpirmar sini nga isa nalang ka PUI ang nagapabilin nga na-admit bangud na-clear na sa balatian ang duha ka mga kaso.
Nagagwa man nga ang nabilin nga PUI ang may yara sang sintomas sang tubercolosis.
Samtang, madamo naman sang mga na-identify nga PUMs sa Cadiz bangud madamo sang nagpauli nagikan sa Metro Manila antes nagtake-effect ang community quarantine didto.
Nahibaluan nga makabig nga PUM ang isa ka tawo kun may yara ini sang travel history sa mga lugar nga may kumpirmado nga kaso sang COVID-19 apang wala sang may ginapakita nga sintomas sang balatian.
Kinahanglan sang mga ini nga mag-obserbar sang 14-day home quarantine.
Samtang, nagapasalamat naman ang alkalde sa Victorias Milling Company matapos nagdonar ang kompaniya sang isa ka drum sang 70% Ethyl Alcohol sa ciudad.
Suno kay Escalante ila ini nga ipang-repack kag ipanghatag sa mga frontliners.
Ginkumpirmar man ni Escalante nga kanselado na ang mga biyahe sa ila nga pantalan kag nagapatuman man sila sang curfew humalin alas-8:00 sang gab-i tubtob alas-4:00 sang kaagahon.
