Patay ang isa ka miyembro sang Citizen Armed Force Geographical Unit (CAFGU) matapos ginbuno sa Purok Cubay, Barangay Sta. Rosa, banwa sang Murcia, kaagahon sang Enero 1, 2025.
Ang biktima ang ginkilala nga si Genno Garcia samtang ang suspetsado ang ginkilala naman nga si Reynaldo Aguisan Jr., 33 anyos, lunsay mga residente sang nasambit nga lugar.
Sa interview sang Bombo Radyo Bacolod kay Police Major Sherwin Fernandez, hepe sang Murcia Municipal Police Station, antes pa man nagluntad ang insidente may yara na nga tema tema ang duha.
Antes ang alas 12:00 ang takna sang kaagahon, Enero 1, ang biktima ang nagpaandar sang motor nga open pipe kun sa diin magahod.
Ginsaway sang suspek ang biktima bangud sa kagahod kun sa diin sila ang nagsabtanay, naglab-utay tubtob nga nagluntad ang pagpamuno.
Nakaagom ang biktima sang pilas sa nawala nga ilok kun sa diin narekober man ang folding knife nga gingamit sang suspek.
Padayon ang pagpangita sang mga kapulisan sa suspek agud madakpan kag mapasakaan sang kaso.
