Gamiton na sang Barangay Mandalagan ang ila nga calamity fund kasunod sang deklarasyon sang cholera outbreak kahapon.
Sa interview sang Bombo Radyo kay Punong Barangay Paul Anieve, ang calamity fund ang gamiton sa pagbakal sang chlorine, bulong, kag semento para sa mga bubon nga kontaminado sa pagkontra sa cholera outbreak.
Suno kay Anieve, padayon ang pagtrabaho nila nga matapna ang kaso sang cholera kag diarrhea matapos nga nagpostibo ang duha ka bubon sa Purok Luhod-Luhod kag Purok Ipil-Ipil nga kontaminado sang bacteria nga nagatuga sang cholera.
Suno kay Anieve, posible nga ang higko ang nagikan sa stagnant water, sa mga poso negro nga malapit sa bubon kag mga bomba kun sa diin mahapos ini malab-ot sang higko, kag isa man sa rason amo ang climate change nga nagadugang sa pagdamo sang bacteria.
Apang sa ila pagtrabaho, may yara sang wala nagakooperar nga suno sa mga residente, mabudlay para sa ila kun tandugon ang bubon bangud wala sila kuhaan sang tubig nga paggagamiton.
Ginahingyo ni Anieve nga mahimos ang mga basura nga mangin malimpyo ang palibot kag sa pagggamit naman sang tubig nga ipa-inom sa mga kasapatan ukon para panglimpyo, mas maayo kun pabukalan ang tubig antes gamiton.
Iya man ginpasalamatan ang kooperasyon sang barangay kag kuntani halungan ang mga kabataan kag katigulangan bangod nga sila ang madali nga maapektuhan sang sakit.
Ginhatagan man ni Anieve sang kasiguraduhan ang mga pumuluyo nga yara ang barangay nga nagasuporta sa ila.
