Ginatinguhaan sang Calatrava Municipal Police Station nga madugangan ang mga barangay nga madeklarar nga cleared na sa iligal nga druga.
Suno kay Police Major Roberto Indiape, hepe sang Calatrava Municipal Police Station, nagsaka na sa lima ang kabug-usan nga numero sang drug-cleared barangays sa amo nga banwa kasunod sang approval sang regional oversight committee sang Pebrero 17 nga cleared na ang Barangay Pantao.
Una na nga gindeklarar ang Barangays Winaswasan, Cambayobo, Cabungahan kag Bagacay nga hilway na sa epekto sang iligal nga druga.
Suno kay Indiape, padayon ang buybust operation nga ila ginapatigayon kag ginabuligan ang mga drug surrenderers agud nga indi masudlan sang durugista ang mga barangay nga nauna na nga naclear.
Nagpanawagan man ang hepe sang kooperasyon sang mga barangay officials sa paghimo sang ila trabaho agud nga mangin tayuyon ang pagbag-o sang mga drug surrenderers.
Nahibaluan nga nagdangat na sa masobra 230 ka mga barangay sa Negros Occidental ang nadeklarar nga drug cleared matapos madugangan sang 12 ka mga barangay nga nakapasar sa Regional Oversight Committee Deliberation sang Miyerkules.
Suno kay PDEA-6 spokesperson Graziella Tanaleon, 29 ka mga barangay sa probinsya ang nag-apply para sa drug clearing sang Miyerkules apang 12 lang ang nakapasar.
Wala naman nakapasa ang ciudad sang Bacolod sini nga bulan gani sa 61 ka mga kabarangayan, 12 pa lang ang drug cleared.
