Nagagwa sa imbestigasyon sang Calatrava Municipal Police Station nga mga miyembro sang NPA ang nagpatay kay Punong Barangay Benjamin Javoc sang Barangay Lalong kahapon sang kaagahon.
Suno kay Police Major Lumyaen Lidawan, hepe sang Calatrava Municipal Police Station, natumod nila nga NPA ang mga suspetsado santo sa description nga ginhatag sang mga saksi kag positibo man nila nga gin-identify sang ginpakita sa mga ini ang litrato sang mga suspect.
Suno kay Lidawan, North Negros Front sang NPA ang nagpatay sa barangay official.
Suno sa mga nakasaksi, pito ang nagpatay kay Javoc.
Alas-4:30 pa lang sang kaagahon sang nagtaghol ang ido nanday Javoc gani nagbangon ini kag nagpangihi.
Pagbalik sang barangay official sa sulod sang balay, ginsundan ini sang mga suspetsado kag gintiro.
Nakalumpat pa ang biktima sa bintana apang ginsundan sang mga suspetsado kag didto na ginpatay.
Ginkuha sang mga suspetsado ang P20,000 nga cash nga ara sa wallet sang biktima antes sila nagbiya sa lugar.
Kaupod ni Javoc sa balay ang iya nga misis kag isa ka anak kag nagpakilala pa sa ila ang mga suspetsado nga sila ang miyembro sang NPA.
Narecover sa crime scene ang siyam ka empty shells sang 5.56 rifle kag M16 rifle.
Suno kay Lidawan, mahimo nga naakig ang mga rebelde bangud isa ang Barangay Lalong sa mga benepisyaryo sang Barangay Development Program.
