BACOLOD CITY – Emosyonal nga ginsaysay sang isa ka bana ang mapait nga gin-agyan sang iya asawa nga callcenter agent sa kamot sang duha ka mga kalalakin-an kahapon, Myerkules sang kaagahon.
Sa exclusive interview sang Bombo Radyo Bacolod kay a certain Ruben, pumuluyo sang Barangay Alijis, ginpahayag sini nga sa tunga-tunga sang las-2:00 tubtob las-2:30 sa kaagahon, iya gindul-ong ang iya asawa nga ginhinago lamang sa ngalan nga “Lyn” agud pasakyon ini sa traysikol padulong sa ginatrabahuan sini nga callcenter sa Negros First Cyber Center.
Nagdulog ang isa ka traysikol nga may sakay nga isa pa ka backrider.
Nagapangduha-duha pa kuntani si Ruben nga pasakyon si Lyn apang hinali ini nagtabok bangud ma-late na ini sa las-3:00 nga duty.
Samtang sakay sang traysikol, ginkatingala na lamang ni Lyn nga nagliko sila sa direksyon padulong sa Barangay Taculing kag sang nagpangusisa ang babayi, ginhambalan ini sang driver nga maga-shortcut sila apang sa amo nga tion, tuman na ang kakulba sang babayi.
Nagdulog ang traysikol agud magpangihi ang driver apang nakibot na lamang si Lyn nga nagtupad na ini sa iya kag ang naga-joy ride na ang nagmaneho.
Samtang nagadalagan ang motor, gintayaan sang lalaki si Lyn sang caliber 45 pistol kag sundang kag gindeklarar ang hold-up.
Wala na gindetalye ni Ruben apang ang pagkuha sang bag nga may unod nga cellphone, P1,400 nga cash kag iban pa nga kagamitan ang ginsundan sang pagbulos-bulos sang duha ka mga lalaki sa iya nga misis malapit sa Granville Subdivision, Brgy. Alijis.
Ginpabutyag ni Ruben nga tuman nga kasakit sa buot kag kaluoy sa iya pinalangga nga asawa ang iya nabatyagan bangud sa mapait sini nga eksperyensya.
Wala pa matumod ang mga suspetsado apang handum gid ni Ruben nga maarestar na ang mga ini agud mapanabat sa krimen nga ila ginhimo.
Para kay Ruben, kulang ang silot nga kamatayon para sa mga nagbiktima sa iya nga asawa kag sa baylo, luyag sini nga tutdan sang amat-amat ang mga ini tubtob nga mapatay.
