Nagapatigayon na sang mga mass evacuation sa tatlo ka mga probinsya sa Canada nga apektado sang nagaluntad nga wild fires.
Sa interview kay Bombo International News Coorespondent Ferdinand Galila, derekta sa Ontario, Canada, ang Alberta, Manitoba kag British Colombia ang ginpaidalum na sa High Fire Danger Zone.
Subong ang kalayo ang naglapta sa 2 km per hour nga kadasigon nga ginatawag sang mga scientist nga “zombie fire”, kag bisan ang mga dinekada na nga mga bombero ang naga-ako nga karun lang sila nakasalapo sang wildfire nga amo ka dasig kun maglapta.
Ini apisar nga spring pa lamang sa pungsod, gani ginakahangaw-an nga mas malala pagid pagdangat sang summer.
Bangod sini, nagapatigayon na sang mga evacuation orders, kag bangod nakaligad nga tuig gin-igo man sang lapnagon nga wildfire ang Canada, ini ang nagserbe naman nga leksyon gani wala na sang nagapakatig-a.
Suno kay Galila, madamo sang Filipino Community sa Manitoba.
Delikado man ang haze sa mga senior citizens kag mga may respiratory illnesses kaangay sang hapo.
Madumduman nga nakaligad nga tuig, bisan ang New York City, sa Estados Unidos ang naapektuhan sang haze, gani nagapati ini nga nagakoordinar naman ang gobyerno sang Canada sa mga kaiping nga pungsod agud magbulig sa pagpakigbato sa kalayo.
Ginapakamaayo naman ni Galila nga tubtob karun wala pa sang reported nga napatay, nasamaran ukon namissing bangod sa nasambitan nga wild fire.
