Wala sang foul play nga nakita sa resulta sang postmortem examination sa nagaka-agnas na nga bangkay sang babayi sa Sofia Gonzaga Avenue, Barangay Estefania Bacolod City sang Martes sang hapon.
Sa interview sang Bombo Radyo Bacolod kay Police Major Joel Reclamado, station commander sang Bacolod Police Station 4, nabatun na nila ang result sang post mortem examination gikan sa Bacolod City Health Office.
Sa resulta, nakita nga cardiovascular arrest ukon cardiac arrest ang kinamatay sang biktima, kag wala man sang senyales sang struggle.
Paathag ni Reclamado nga may suksok man nga underwear kag shorts ang biktima, kag ginabanta tatlo tubtob apat na ka semana sa area gani ini ang yara na sa advance stage of decomposition.
Bangod wala sang nakita nga foul play, ginalantaw sini nga mahimo nagpangihi ukon nagpahuway lamang sa area ang babayi sang gin-atake sang cardiac arrest.
Sa karun, padayun ang panawagan sang Bacolod Police Station 4 sa mga may himata nga babayi nga wala nakapauli sang kapin isa ka bulan agud ini ang ila maupdan sa pagtsekyar kun ila himata ang biktima.
SAMTANG…. Segurado ang Punong Barangay sa Barangay Estefania, Bacolod City nga indi nila pumuluyo ang nasapwan nga bangkay sang babayi kag nasapwan nga patay nga fetus sang nakaligad nga mga inadlaw.
Madumduman nga nasapwan sang Martes sang hapon ang nagakaagnas na nga bangkay sang babayi sa Sofia Gonzaga Avenue, samtang sang Miyerkules sang aga nasapwan naman ang patay nga fetus nga nasulod sa box sang sapatos sa suba sa Purok Kaburihan Economic Highway sa nasambitan nga Barangay.
Sa interview sang Bombo Radyo Bacolod kay Punong Barangay Engr. Jerry Tingson, segurado ini nga indi taga-Estefania ang nasapwan nga nagaka-agnas nga bangkay bangod wala man sang reported nga missing.
Dugang pa sini nga naghatag man ini sang instruction sa monitoring team sa kada Purok nga indi magpatumbaya.
Suno diri, may record man ang monitoring team kasubong man ang Barangay Health Center sang mga nagabusong kag posible nagbata.
Gani kun residente sa Barangay ang iloy sang fetus, ini ang madasig nga matumod.
Ginapadasig naman sini ang electrification project sa tinutuyo nga masugaan ang tanan nga dalanon sa Barangay Estefania.
Sa mga lugar nga indi malab-utan sang kuryente kag indi matakdan sang street lights, ginalantaw na sini ang pagbutang sang mga solar lights.
Paathag ni Tingson nga may street light sa dalan kun sa diin nakit-an ang bangkay sang babayi, apang indi na malab-ot sang suga ang matag-as nga kahilamunan kun sa diin gid ini nasapwan.
Gani ginmando man sang Punong Barangay ang paghawan sang mga masiot nga lugar.
