Nagtapos sa 12th place sa all-around final sang men’s artistic gymnastics sa Paris Olympics si Carlos Yulo sa Bercy Arena kaina sang kaagahon.
Apisar nga wala ini nakadaog sang medalya sa all-around event, may tiyansa ini sa gihapon sa vault kag floor exercise events.
Wala nangin maayo ang panugod sini matapos siya ang matumba sa pommel horse sa una nga rotation kag nakakuha lamang sang score nga 11.900.
Apang nagbawi ini sa ikaduha nga rotation kag nakascore sang 13.933 sa rings kag ginsundan sang 14.766 sa vault, isa sa iya paborito nga apparatus.
Si Yulo ang nakascore sang 14.500 sa parallel bars kag 13.600 sa horizontal bar nga ginsundan sang 14.333 sa floor exercises rason kun ngaa nakaangkon ini sang kabug-usan nga 83.032.
Nakakuha sang gold medal si Oka Shinnosuke sang Japan, nga may total score nga 86.832. Nagpangaduha si Zhang Boheng (86.599) kag nagpangatlo naman si Xiao Ruoteng (86.364) nga lunsay taga China.
Apisar nga wala nakakuha sang medalya si Yulo, may tiyansa pa ini sa final sang floor exercise sa Agosto 3 kag vault sa Agosto 4.
